Markte op Maandeinde – 01/2022

Monthly Market Update

Januarie oorsig

Januarie was ’n gebeurtenisvolle-, en in baie opsigte, ’n ontstellende, begin van die jaar. Suid-Afrikaanse aandele het egter die wêreldwye dalende tendens ontsnap en die eerste maand van 2022 op ’n positiewe noot afgesluit. Sasol was die toppresteerder en het met 33% vir die tydperk gestyg, op die rug van verhogings in energiepryse. Op die pandemie-front het SA se Covid-19-infeksies aanhou daal.

Tydens die Januarie-vergadering het die SARB se Monetêre Beleidskomitee (MBK) die repokoers tot 4% verhoog. Die verhoging van 25 basispunte was algemeen verwag en het bykomend tot ’n soortgelyke verhoging in November 2021 gekom, wat dit slegs die tweede koersverhoging in meer as drie jaar maak. Die MBK glo ’n geleidelike styging in die repokoers sal voldoende wees om inflasieverwagtinge goed geanker te hou. Die Reserwebank het ook sy ekonomiese groei-voorspelling vir 2021 tot 4,8% verlaag vanaf ’n vroeëre skatting van 5,2%.

Wêreldwye aandelemarkte het ’n wisselvallige begin tot 2022 gehad met rentekoersverhogings wat in Januarie weer die hoofonderwerp van bespreking was. Ontwikkelde markte het gesukkel om die verwagte rentekoersverhogings en inflasiedruk te absorbeer. Dit het daartoe gelei dat aandele-, eiendoms- en effekte-indekse die jaar in die rooi afgeskop het.

Stygende politieke spanning rondom die opbou van Russiese troepe op die grens van Oekraïne het druk op ’n alreeds-stram globale energie-mark geplaas. Brent-ruolie het die maand 17% hoër gesluit teen byna $91 per vat – die hoogste vlak sedert Januarie 2014.

Ná Januarie se Amerikaanse Federale Reserweraadvergadering was die Fed se verklaring en daaropvolgende V&A-sessie meer omsigtig as wat beleggers verwag het. Jerome Powell het genoem dat daar heelwat ruimte sal wees om rentekoerse te verhoog sonder om die arbeidsmark te bedreig. Dit het wydverspreide verwagtinge bevestig dat die eerste rentekoersverhoging by die Fed se volgende vergadering op 16 Maart sal wees. Dié vooruitsig van strenger sentrale bankbeleid het mark-onbestendigheid verhoog.

Vrywaring:
Die bogenoemde inligting is slegs vir inligtingsdoeleindes, en nie advies soos gedefinieerd in die Wet op Finansiële Advies- en Tussengangersdienste, 37 van 2002, nie. Alhoewel alle maatreëls geneem is in die voorbereiding van hierdie dokument, aanvaar RiG Adviesdienste (Pty) Ltd geen verantwoordelikheid vir enige optrede wat mag voortspruit uit hierdie dokument nie. Raadpleeg ons vir persoonlike advies gepas vir jou omstandighede. RiG Adviesdienste (Pty) Ltd is ‘n gemagtigde finansiëlediensteverskaffer (FSP nommer: 44730).


No Comments

Comments are closed.